जिल्ला कास्की, पोखरा महानगरपालिका वडा नं. २८ मा कार्यरत सव-इन्जिनियर प्रविन बि.क. उपर घुस/रिसवत लिई भ्रष्टाचार गरेको सम्बन्धी आरोप-पत्र दायर।
प्रेस विज्ञप्ति:- मिति २०८०।०१।२५ गते ।
----------------------------------------------------
जिल्ला कास्की, पोखरा महानगरपालिका २८ नं. वडा कार्यालयमा कार्यरत सव-इन्जिनियर प्रविन बि.क.ले बाटो निर्माण कार्यमा जग्गा मिल्ने गरी बाटो लगिदिने भनी सेवाग्राहीसँग घुस/रिसवत माग गरिरहेको भन्ने सूचना एवं उजुरी निवेदनका आधारमा अख्तियार दुरुपयोग अनुसन्धान आयोगको कार्यालय, पोखराबाट खटिई गएको टोलीले निज सव-इन्जिनियर प्रविन बि.क. लाई सेवाग्राहीबाट रु. १५,०००।- (पन्ध्र हजार रुपैयाँ) घुस/रिसवत लिइसकेको अवस्थामा मिति २०७९।१२।०३ गते नियन्त्रणमा लिइएको थियो।
अनुसन्धानको सिलसिलामा पोखरा महानगरपालिका वडा नं. २८ मा कार्यरत सव-इन्जिनियर प्रविन बि.क.ले जग्गाको छेउबाट बाटो निकाली दिने भनी सेवाग्राहीसँग रु.१५,०००।- घुस/रिसवत माग गरी लिएको पुष्टि हुन आएको हुँदा निजले भ्रष्टाचार निवारण ऐन, २०५९ को दफा ३ को उपदफा (१) बमोजिमको कसुर गरेकोले निजलाई उल्लिखित कसुरमा बिगो रु.१५,०००।–(पन्ध्र हजार रुपैयाँ) कायम गरी भ्रष्टाचार निवारण ऐन, २०५९ को दफा ३ को उपदफा (१) को देहाय (क) बमोजिम कैद र ऐ. ऐनको दफा ३ को उपदफा (१) बमोजिम जरीवाना हुन मागदावी लिई आज बिशेष अदालत, काठमाडौंमा आरोपपत्र दायर गरिएको छ।
प्रवक्ता
भोला दाहाल
Tweet