खाँडाचक्र नगरपालिका, नगरकार्यपालिकाको कार्यालय, कालिकोटमा कार्यरत सहायकस्तर पाँचौ (नायव सुब्वा) दिपकराज देवकोटा उपर गैरकानूनी लाभ तथा हानी पुर्याई भ्रष्टाचार गरेको सम्बन्धी आरोप-पत्र दायर।
प्रेस विज्ञप्ति:- मिति २०७९।०९।१२ गते ।
----------------------------------------------------
जिल्ला कालिकोट, खाँडाचक्र नगरपालिकाले पोल्ट्री वंगुर फार्मसँग ४२० कुखुरा उपलब्ध गराउने गरी सम्झौता गरेतापनि नायब सुब्बा दिपकराज देवकोटाले उक्त फार्मको नाममा भुक्तानी लिई चेक लुकाएर फार्मसँग घुस/ रिसवत मागेको भन्ने उजुरी निवेदन सम्बन्धमा अनुसन्धान हुँदा खाँडाचक्र नगरपालिका, नगरकार्यपालिकाको कार्यालय, कालिकोटमा कार्यरत सहायकस्तर पाँचौ (नायव सुब्वा) दिपकराज देवकोटाले खाँडाचक्र नगरपालिकाद्धारा वडा नं. ३ र ४ मा लघु उद्यम विकास अन्तर्गत कुखुरा पालन सीप विकास तालिम कार्यक्रममा कुखुराको साकोनी जातको चल्ला मात्र सम्झौताकर्ताबाट खरिद गरी तालिम कार्यक्रम आफैंले सञ्चालन गर्ने भनी आफैंले गरेको सम्झौताको शर्त पूरा नगरी पूरा समयावधि तालिम सञ्चालन नगरी जम्मा १ दिन मात्र तालिम सञ्चालन गरी १५ दिन सञ्चालन गरेको देखाई कार्यक्रम पूर्ण रुपमा सञ्चालन भएको भनी झुट्टा विल भरपाई तथा कागजात तयारी गरी कार्यालयमा पेश गरी भुक्तानी लिई रु.१,९७,८९५।- हिनामिना गरेको हुँदा निज नायब सुब्बा दिपक राज देवकोटाको उक्त कार्य भ्रष्टाचार निवारण ऐन, २०५९ को दफा ८(१) को देहाय (ङ) बमोजिम कसुर भएकोले निज दिपकराज देवकोटालाई रू.१,९७,८९५।- (एक लाख सन्तानब्बे हजार आठ सय पन्चानब्बे रुपैँया) विगो कायम गरी भ्रष्टाचार निवारण ऐन, २०५९ को दफा ८ को उपदफा (१) वमोजिम कैद र विगो वमोजिम जरिवाना गरी कायम हुन आएको विगो असुल उपर हुन मागदाबी लिइएको छ ।
साथै, निज दिपकराज देवकोटाले पोल्ट्री बंगुर फार्मलाई रु.१,८०,१८०।- सम्झौता अनुसार कुखुरा चल्लाको भुक्तानी दिनुपर्नेमा उक्त रकमबाट रु.३०,१८०।- चेकमार्फत घुस/रिसवतवापत लिएको देखिंदा निजले भ्रष्टाचार निवारण ऐन, २०५९ को दफा ३ को उपदफा (१) र ऐ.ऐ. दफा ३ को उपदफा (१) को खण्ड (ख) बमोजिम कसुर गरेकोले निजलाई रु.३०,१८०।- (तीस हजार एक सय असी रुपैँया) विगो कायम गरी भ्रष्टाचार निवारण ऐन, २०५९ को दफा ३ को उपदफा (१) र दफा ३ को उपदफा (१) को देहाय (ख) अनुसार कैद र बिगोबमोजिम जरिवाना एवं रिसवत लिएको रकमसमेत जफत हुन मागदाबी लिई अख्तियार दुरुपयोग अनुसन्धान आयोग ऐन, २०४८ को दफा १८ र ३५ तथा भ्रष्टाचार निवारण ऐन, २०५९ को दफा ३६ बमोजिम आज विशेष अदालत, काठमाडौंमा आरोपपत्र दायर गरिएको छ ।
प्रवक्ता
श्याम प्रसाद भण्डारी
Tweet