जिल्ला सर्लाही, इश्वरपुर न.पा. वडा नं. ११ का वडाध्यक्ष राम दुलार साहसमेत ३ जना उपर बिगो रु. १,५०,०००।- कायम गरी घुस/रिसवत लिई भ्रष्टाचार गरेको सम्बन्धी आरोप-पत्र दायर।
प्रेस विज्ञप्ति :- मिति २०७८।०९।१६ गते ।
-------------------------------------------------
जिल्ला सर्लाही, इश्वरपुर न.पा. वडा नं. ११ का वडा सदस्यद्वय सोनेलाल साह रौनियार र उमेश रायले ढलान सम्बन्धी काम सम्पन्न पश्चात उपभोक्ता समितिलाई कार्य सम्पन्न सिफारिस गरिदिएवापत घुस/रिसवत रु. १,५०,०००।- माग गरिरहेको भन्ने सूचना एवं उजुरी निवेदनको आधारमा अख्तियार दुरुपयोग अनुसन्धान आयोगको कार्यालय, बर्दिवासबाट खटि गएको टोलीले निज सोनेलाल साह रौनियार र उमेश रायलाई सेवाग्राहीबाट रु. १,५०,०००।–(एक लाख पचास हजार रुपैयाँ) घुस/रिसवत लिइसकेको अवस्थामा मिति २०७८।०७।२९ गते नियन्त्रणमा लिइएको थियो ।
अनुसन्धानको सिलसिलामा जिल्ला सर्लाही, ईश्वरपुर न.पा. वडा नं. ११ मा निर्माण भएको भलुवाई सडक निर्माण कार्य सम्पन्नपश्चात भुक्तानीको लागि सिफारिस लिन जाँदा सेवाग्राहीसँग बडाध्यक्ष राम दुलार साह र उमेश रायले घुस/रिसवत रु.१,५०,०००।– माग गरी आफ्नो ओहोदा र पदीय दायित्वसमेत ख्याल नगरी बदनियतपूर्बक रकमको बार्गेनिङ गरी घुस/रिसवतवापतको रकम राम दुलार साहको निर्देशनमा उमेश रायले लिई सोनेलाल साह रौनियारलाई राख्न दिई सोनेलाल साह रौनियारबाट उक्त रकम बरामद भएको पुष्टि हुन आएको हुँदा निज राम दुलार साह, सोनेलाल साह रौनियार र उमेश रायले भ्रष्टाचार निवारण ऐन, २०५९ को दफा ३ को उपदफा (१) को कसुर गरेकोले निजहरुलाई बिगो रु.१,५०,००० (एक लाख पचाँस हजार रुपैयाँ) कायम गरी भ्रष्टाचार निवारण ऐन २०५९ को दफा ३ को उपदफा (१) र दफा ३ को उपदफा (१) को खण्ड (घ) वमोजिम सजाय हुन मागदावी लिई अख्तियार दुरुपयोग अनुसन्धान आयोग ऐन, २०४८ को दफा १८ र दफा ३५ बमोजिम आज विशेष अदालत काठमाण्डौमा अरोपपत्र दायर गरिएको छ ।
प्रवक्ता
नारायण प्रसाद रिसाल
Download
Tweet