बर्दिया जिल्ला, राजापुर नगरपालिका वार्ड नं.-८, धोविनपुर बस्ने मनकला चौलागाई आचार्य र निजको श्रीमान मनिलाल आचार्य उपर झुठ्ठा विवरण उल्लेख गरी भ्रष्टाचार गरेको सम्बन्धी आरोप-पत्र दायर।
प्रेस विज्ञप्ति :- मिति २०७८।०८।२८ गते ।
-------------------------------------------------
बर्दिया जिल्लाको आ.व. २०७४/७५ सालको शिक्षक सेवा आयोगको प्राथमिक तह तृतीय श्रेणीको खुल्ला तथा महिलाको लिखित परीक्षामा सम्मिलित भएका उम्मेदवार मनकला चौलागाई (आचार्य) र मनिलाल आचार्य नातामा श्रीमान् श्रीमती भएका व्यक्तिहरुले शिक्षक सेवा आयोगबाट सञ्चालन भएको प्राथमिक तह तृतीय श्रेणीको लिखित परीक्षामा आफ्नो उत्तरपुस्तिकामा एकअर्काको रोल नं. लेखी साटासाट गरी बुझाएको भन्ने उजुरी सम्बन्धमा अनुसन्धान हुँदा बर्दिया जिल्ला, राजापुर नगरपालिका वार्ड नं.-८, धोविनपुर बस्ने मनकला चौलागाई र निजको श्रीमान् मनिलाल आचार्यले आ-आफ्नो व्यक्तिगत विवरण उल्लेख गरी परीक्षा दिनुपर्नेमा झुठ्ठा विवरण उल्लेख गरी एकअर्काको नामवाट परीक्षा दिई सार्वजनिक पदमा नियुक्ति लिने कार्य गरेको र सो कार्य भ्रष्टाचार निवारण ऐन, २०५९ को दफा १६ को उपदफा (१) बमोजिम कसुरजन्य कार्य भएकोले निजहरू मनिलाल आचार्य र मनकला चौलागाई (आचार्य) उपर भ्रष्टाचार निवारण ऐन, २०५९ को दफा १६ को उपदफा (१) बमोजिम सजाय हुन र आरोपीमध्येका मनकला चौलागाइले झुट्टा विवरण उल्लेख गरी वदनियत राखी नियुक्ति लिई प्राथमिक बिद्यालय ललितापुर बर्दियामा पदस्थापन भई तलब भत्ताबापत सरकारी रकम रु.६,७४,५११।- समेत लिई सरकारी रकम दुरुपयोग गरेको देखिएको र सो कार्य भ्रष्टाचार निवारण ऐन, २०५९ को दफा १७ बमोजिमको कसुरजन्य कार्य भएकोले निजलाई बिगो रु.६,७४,५११।– (छ लाख चौहत्तर हजार पाँच सय एघार रुपैयाँ) कायम गरी सोही ऐनको दफा ३ को उपदफा (१) र दफा ३ को उपदफा (१) को देहाय खण्ड (ङ) बमोजिम सजाय गरी सोही ऐनको दफा १७ बमोजिम उक्त बिगो रकमसमेत असुलउपर हुन मागदावी लिई आज विशेष अदालत, काठमाडौंमा आरोपपत्र दायर गरिएको छ।
प्रवक्ता
नारायण प्रसाद रिसाल
Tweet