कर्णाली प्राविधिक शिक्षालयमा कृषि प्रशिक्षण सहायक पदमा कार्यरत गंगाराज शाहीसहित ३ जनाउपर आरोपपत्र दायर।
प्रेस विज्ञप्ति :- मिति २०७६।०९।२३ गते ।
------------------------------------------
प्राविधिक शिक्षा तथा व्यावसायिक तालिम परिषद्को परीक्षा कार्यक्रम अनुसार कर्णाली प्राविधिक शिक्षालयमा संचालित कृषितर्फको डिप्लोमा (I.Sc.Ag.) प्रथम वर्षको बाह्य परीक्षामा परीक्षार्थी गंगाराज शाहीका उत्तरपुस्तिकाहरु परिवर्तन गरी अनियमितता गरेको भन्ने व्यहोराको उजुरीउपर अनुसन्धान हुँदा कर्णाली प्राविधिक शिक्षालयमा कृषि प्रशिक्षण सहायक पदमा कार्यरत रहेका र तलबी अध्ययन बिदामा सोही शिक्षालयमा अध्ययनरत रहेका गंगाराज शाही र कर्णाली प्राविधिक शिक्षालयका परीक्षा सहायक तथा उक्त परीक्षाका निरीक्षक चन्द्रसिंह खत्रीले एकआपसमा मिलेमतो गरी अङ्ग्रेजी विषय बाहेक अन्य सबै विषयको परीक्षामा खाली उत्तरपुस्तिका तथा प्रश्नपत्र परीक्षा हल बाहिर पठाई गैरपरीक्षार्थी टंकप्रसाद चौलागाईलाई उत्तर लेख्न लगाई पृष्ठहरु गंगाराज शाहीको उत्तरपुस्तिकामा संलग्न गरी भ्रष्टाचार निवारण ऐन, २०५९ को दफा १३ बमोजिम प्रश्नपत्रको गोपनियता भंग तथा परीक्षाको परिणाम फेरबदलसम्बन्धी कसुर गरेको पुष्टि हुन आएकोले निज गंगाराज शाही र चन्द्रसिंह खत्रीलाई भ्रष्टाचार निवारण ऐन, २०५९ को दफा १३ बमोजिमको सजाय हुन मागदाबी लिइएको छ ।
साथै तत्कालीन समयमा कर्णाली प्राविधिक शिक्षालयमा I.Sc.Ag. तेस्रो वर्षमा अध्ययनरत विद्यार्थी टंकप्रसाद चौलागाईले I.Sc. Ag. प्रथम वर्षको बाह्य परीक्षामा अङ्ग्रेजी विषयमा बाहेक अन्य सबै विषयमा परीक्षा सहायक तथा परीक्षाका निरीक्षक चन्द्रसिंह खत्रीले उपलब्ध गराएका प्रश्नपत्रका उत्तरहरु, निजले नै उपलब्ध गराएका उत्तरपुस्तिकाका पृष्ठहरुमा लेखिदिएको र टंकप्रसाद चौलागाईले उत्तर लेखेका पृष्ठहरु नै परीक्षार्थी गंगाराज शाहीका उत्तरपुस्तिकामा संलग्न गरेको देखिएबाट निज टंकप्रसाद चौलागाईले भ्रष्टाचार निवारण ऐन, २०५९ को दफा १३ बमोजिमको कसुरको मतियार हुने कार्य गरेकोले भ्रष्टाचार निवारण ऐन, २०५९ को दफा २२ मा उल्लेख भएबमोजिम निजलाई भ्रष्टाचार निवारण ऐन, २०५९ को दफा १३ मा उल्लेखित सजायको आधा सजाय हुन मागदाबी लिई आज विशेष अदालत काठमाडौंमा आरोपपत्र दायर गरिएको छ ।
प्रवक्ता
प्रदीपकुमार कोइराला
Download Now
Tweet