प्रेस विज्ञप्ति :- मिति २०८१।०५।१४ गते ।
-------------------------------------------------

प्रतिवादीहरु गोदावरी नगरपालिकाका प्रमुख प्रशासकीय अधिकृत खेमराज बिष्ट, ईन्जिनियर पुर्ण कुँवर र सब-ईन्जिनियर प्रतिवादी नरेन्द्र शाहीले भ्रष्टाचार निवारण ऐन, २०५९ को दफा ८ को उपदफा (१) को देहाय (ख),(ग) र (ङ) बमोजिमको कसूर गरेको देखिदा निज प्रतिवादीहरुलाई बिगो रु. १५,१७,६९७/४० (अक्षरुपी पन्ध्र  लाख सत्र हजार छ सय सन्तान्बे पैसा चालीस) कायम गरी सोही ऐनको दफा ८(१) बमोजिम कैद गरी बिगो बमोजिमको जरिवाना तथा विगो समेत असूलउपर हुन र अर्का प्रतिवादी प्राबिधिक पूर्वाधार कार्यालयका ल्याब टेक्निसियन धन बहादुर बिष्टले भ्रषटाचार निवारण ऐन, २०५९ को दफा १९ को उपदफा (२) बमोजिमको कसूर गरेको देखिदा सोही ऐनको दफा १९(२) बमोजिम सजाय हुन र बाली चन्द निर्माण सेवा प्रा.लि.का प्रबन्ध निर्देशक प्रतिवादी हरि सिंह बिष्टले भष्टाचार निवारण ऐन, २०५९ को दफा ८ को उपदफा (४) बमोजिमको कसूर गरेको देखिदा नगद रू.  १५,१७,६९७/४० (अक्षरुपी पन्द्र  लाख सत्र हजार छ सय सन्तान्बे पैसा चालिस) बिगो कायम गरी भ्रष्टाचार निवारण ऐन,२०५९ को दफा ८(४) वमोजिम कैद विगो वमोजिमको जरिवाना र उक्त विगो समेत असूलउपर हुन माग दावी लिई विशेष अदालत, काठमाडौंमा आरोपपत्र दायर गरिएकोमा विशेष अदालतको मिति मिति  २०८०।०९।२२ को फैसलाबाट उक्त मुद्दाका प्रतिवादीलाई- 

 

क. वेस कोर्स र सब-वेस कोर्सको Gradation Test बाट निर्माण कार्य स्पेसिफिकेशन बमोजिम नभइ गुणस्तर नपुगेको भन्ने सम्बन्धमा विशेषज्ञ रायको आधारमा वादी दाबी नपुग्ने देखिएको, निर्माण कार्य सम्पन्न भई नियमित रुपमा सञ्चालनमा रहेको एक वर्षपछि वादीले gradation test गरेको हुँदा Disturbed Sample को परीक्षणबाट सही नतिजा आउन सक्ने नदेखिएको भनी विशेषज्ञ रायसमेतबाट वादी दाबी पुष्टि हुन नसक्ने।

ख. Standard Specifications for Roads and Bridges सडकको Premix Carpet को मोटाई नापजाँच गर्दा हरेक २० मिटरको चेनेजमा सम्बद्ध विन्दु (Conjugative Point) कायम गरी नापजाँच गर्नु पर्नेमा वादीले सो मापदण्ड बमोजिम नापजाँच गरेको पुष्टि हुन नसकेकोले वादीको नापजाँच प्रतिवेदन विश्वसनीय प्रमाणको रुपमा ग्रहणयोग्य हुन नसक्ने।

ग. गोदावरी नगरपालिकाको ठेक्काहरू अन्तर्गत बनेका सडकहरुको आयोगको टोलीले पेश गरेको स्थलगत निरीक्षण प्रतिवेदनमा अघि त्रुटी सच्याउने अवधि भित्र नै सो रकम शोधभर्ना गरिएको कुरा स्वीकार गरिएको; सडकको नापजाँच गर्दा प्रत्येक २० मिटरको दूरीमा Sampling Chainage राखेको नदेखिंदा Standard Specification for Roads and Bridge Work, २०५८ को विधि अनुरुप नभइ स्थलगत निरीक्षण प्रतिवेदनको आधारमा मात्र Premix Carpeting को समग्र मोटाई नपुगेको भन्न मिल्ने नदेखिएको,

लगायतका आधारमा प्रतिवादीहरूले आरोपीत कसूरबाट सफाई पाउने भनी सफाई दिएकोमा आयोगबाट देहायका आधारहरू लिई सम्मानित सर्वोच्च अदालतमा मिति २०८१/०५/१४ मा पुनरावेदन गरिएको छ।

 

क. बाली चन्द्र निर्माण सेवा प्रा.लिबाट कार्य सम्पादन भएको सडकको ठेक्कामा भुक्तानी भएको परिमाण (Quantity) को स्थलगत निरीक्षण आयोगको टोलीसहित स्थानीय जनप्रतिनिधि, सम्बन्धित निर्माण व्यवसायी, नगर- पालिकाका प्राबिधिकहरुको उपस्थितिमा गुणस्तर परीक्षण नतिजा बाहेक खुद नापजाँचको आधारमा काम तामेल भएको मुचुल्का सहितको प्रतिवेदनबाट देखिएको।

ख. गोदावरी नगरपालिका, कैलालीमा आ.व. २०७६/७७ मा निर्माण भएका १३ वटा सडकहरु मध्ये बाली चन्द्र निर्माण सेवा प्रा.लिबाट निर्माण भएको राम जानकी मन्दिर जाने सडकको Test Result  सडक विभागको प्रयोगशालाबाट प्राप्त  गुणस्तर प्रतिवेदनबाट देखिएको र उक्त गुणस्तर परीक्षण नतिजा उपर विश्लेषणको लागि ईन्जिनियरिङ्ग अध्ययन संस्थान, पुल्चोकमा लेखी पठाइएकोमा तोकिएको गुणस्तरको बेस कोर्स र सबबेस कोर्सको निर्माण  भएको नदेखिएकोले Composition/gradation of base/subbase material मा फरक भएको अवस्थामा Unstable layer तयार हुने र सडक सतह चाँडै बिग्रिने र Intrusion of subgrade soil ले गर्दा base/subbase को desired property परिवर्तन भई तहगत गुणस्तर समय क्रममा खस्किदै जाने र सवारी साधनको भार सहने क्षमता समाप्त हुँदै जाने हुँदा उक्त सडक खण्डहरुमा तोकिएको अवधि अगावै पुन:निर्माण गर्नुपर्ने भई सरकारी रकम हानि नोक्सानी हुने भनी बिशेषज्ञको प्रतिवेदनबाट देखिदा देखिदै प्रतिवादीहरुलाई सफाई दिने गरी विशेष अदालतले गरेको फैसला त्रुटिपूर्ण रहेको। 

ग. एक पटक शुरु विशेषज्ञले अदालतमा वकपत्र गर्दा प्रतिवेदन ठिक छ भनी वकपत्र गरेबाट उक्त प्रतिवेदन प्रमाण ग्राही भै सकेको अवस्थामा विशेष अदालतले कानूनको गलत व्याख्या हुने गरी बिशेषज्ञ टोली गठन गरी उक्त टोलीको राय बुझी वकपत्र समेत गराई भएको प्रतिवेदनलाई नजरअन्दाज गरी प्रमाण ऐन, २०३१ को दफा २०,२३ र दफा ५१ बिपरीत नयाँ गठित बिशेषज्ञ टोलीको राय बुझी वकपत्र समेत गराई प्रतिवादीहरुलाई सफाई दिने गरी गरेको फैसला त्रुटिपूर्ण रहेको। 

घ. ठेक्का कार्यको लागि निर्माण व्यवसायीलाई दिएको कार्यादेशमा निर्माण व्यवसायीलाई गुणस्तर, लागत, परिमाणलाई मध्येनजर गर्दै वातावरणीय पक्षलाई समेत ध्यान दिने गरी निर्धारित समयावधी भित्र कार्य सम्पन्न गर्न भनी उल्लेख भएको र उक्त कार्यादेश पत्रको बोधार्थमा इन्जिनियर श्री पुर्ण कुँवरलाई दिएको देखिदा खेमराज बिष्ट र पुर्ण कुँवरले कार्यदेश बमोजिम कामकारवाही नगरेको तर्फ विशेष अदालतले विश्लेषण नै नगरी गरेको फैसला त्रुटिपूर्ण रहेको।

ङ. गोदावरी नगरपालिकाले नापी किताबमा उल्लेख गरे बमोजिम स्वीकार्यता चेक जाँच गरेको नगरेको र Specification एवं नापी किताव बमोजिम भुक्तानी नगरी सम्पूर्ण नापलाई औसतको रुपमा भुक्तान गरेकोले समेत Specification बमोजिम भुक्तानी नभई बढी भुक्तानी भएको देखिएको र वास्तविक कार्य सम्पादनको परिमाण यकिन गर्न सम्बन्धित कार्यको भुक्तानी प्रयोजनको लागि तोकिएको विधीवाट नाप लिई सके पनि Road Works Overall Requirement बमोजिम  गर्नु पर्ने कुनै कामको विश्लेषणनै नगरी प्रतिवादीहरुलाई सफाई दिने गरी विशेष अदालतबाट भएको फैसला त्रुटिपूर्ण रहेको।

 

                                                                        प्रवक्ता

नरहरि घिमिरे