गोल्डेन लाइट ट्राभल एण्ड टुर्स प्रा.लि.का म्यानेजिङ डाइरेक्टर बिनोद कुमार भूजेल समेत ५ जना उपर आरोपपत्र दायर।
प्रेस विज्ञप्ति :- मिति २०७६।०८।२९ गते ।
---------------------------------------------------
जिल्ला काठमाण्डौ, गोल्डेन लाइट ट्राभल्स एण्ड टुर्स संचालन गर्ने बिनोद कुमार भूजेलसमेतले श्रम स्वीकृति लिन वैदेशिक रोजगार कार्यालय ताहाचल जाँदा विभिन्न बहाना बनाई निवेदकसँग रु.२२,०००।- घुस/रिसवत माग गरेको भन्ने उजुरी उपर अनुसन्धान हुँदा गोल्डेन लाइट ट्राभल एण्ड टुर्स प्रा.लि.का म्यानेजिङ डाइरेक्टर बिनोद कुमार भूजेलले, बसन्त श्रेष्ठ, बुध्द तामाङ, अजय नगर्जी परियार र प्रहरी जवान रमेश सिंह विष्ट समेतको मिलेमतोमा सेवाग्राहीको जापान जाने श्रम स्वीकृतिको काम छिटो गरिदिने भनी रु.२२,०००।- विनोद कुमार भूजेलसमेतले घुस/रिसवतवापत लिएको तथ्य पुष्टि हुन आएकोले निजहरु बिनोद कुमार भूजेल, बसन्त श्रेष्ठ, अजय नगर्जी परियार, बुध्द तामाङलाई भ्रष्टाचार निवारण ऐन, २०५९ को दफा ३ को उपदफा (२) बमोजिमको र महानगरीय दंगा नियन्त्रण प्रहरी गण, त्रिपुरेश्वरमा कार्यरत प्रहरी जवान रमेश सिंह विष्टले भ्रष्टाचार निवारण ऐन, २०५९ को दफा ३ को उपदफा (१) को कसुर भए गरेको सप्रमाण पुष्टि हुन आएकोले निजहरू बिनोद कुमार भूजेल, बसन्त श्रेष्ठ, अजय नगर्जी परियार, बुध्द तामाङलाई भ्रष्टाचार निवारण ऐन, २०५९ को दफा २ मा उल्लेख भएबमोजिम र प्रहरी जवान रमेशसिंह विष्टलाई सोही ऐनको दफा ३ को उपदफा (१) को कसुरमा निज पाँचै जनालाई बिगो रु.२२,०००।- (बाइस हजार) कायम गरी भ्रष्टाचार निवारण ऐन, २०५९ को दफा ३ को उपदफा (१) र दफा ३ को उपदफा (१) को खण्ड (क) बमोजिम जरिवाना र कैद सजायको मागदावी लिई आज विशेष अदालत, काठमाडौंमा आरोपपत्र दायर गरिएको छ ।
प्रवक्ता
प्रदीपकुमार कोइराला
Tweet