यातायात व्यवस्था कार्यालय, सेती अञ्चल धनगढीमा कार्यरत टाइपिष्ट नायब सुब्बा लक्ष्मी देवी शाहउपर आरोपपत्र दायर।
प्रेस विज्ञप्ति :- मिति २०७६।०९।११ गते ।
---------------------------------------------------
यातायात व्यवस्था कार्यालय, सेती अञ्चल धनगढीमा कार्यरत टाइपिष्ट नायब सुब्बा लक्ष्मी देवी शाहको शैक्षिक योग्यताको प्रमाणपत्र नक्कली रहेको भन्ने उजुरी सम्बन्धमा अनुसन्धान हुँदा निजले श्री शारदा माध्यमिक विद्यालय हरिपुर धादिङ मकवानपुरबाट टेष्ट उत्तीर्ण गरेको झुठ्ठा शैक्षिक योग्यताको प्रमाणपत्र पेश गरी वि.स. २०४० सालमा मुखिया पदमा प्रवेश गरी हाल टाइपिष्ट नायब सुब्बा पदमा वहाल रही सरकारी सुविधा एवं लाभ हासिल गरेको कार्य साविक भ्रष्टाचार निवारण ऐन, २०१७ को दफा १२ र प्रचलित भ्रष्टाचार निवारण ऐन, २०५९ को दफा १६ को उपदफा (१) बमोजिमको कसुर गरेको पुष्टि हुन आएको हुँदा निजलाई साविक भ्रष्टाचार निवारण ऐन, २०१७ को दफा १२ र दफा २९ को उपदफा (२) तथा प्रचलित भ्रष्टाचार निवारण ऐन, २०५९ को दफा १६ को उपदफा (१) बमोजिमको सजाय हुन मागदाबी लिई आज विशेष अदालत, काठमाडौंमा आरोपपत्र दायर गरिएको छ ।
प्रवक्ता
प्रदीपकुमार कोइराला